Bruvik skule
Bruvik skule: omkransa av fjord og fjell
Bruvik skule ligg i Bruvik som er ei bygd med variert og fin natur, med skog og mark og opnare lende innimellom, omkransa av fjell og fjord. Naturen nyttar me oss mykje av når me tar elevane med ut på ulike turar og undervisningsopplegg. Mellom anna er det eit område på Olsnes som skulen har fått høve til å nytta seg av på utedagane. Men av og til drar me til fjells der me vår og haust kan fiska og gå fine fotturar, eller om vinteren bruka ski og skeiser. Nede ved fjorden har me også mange fine område der det høver med fisking og andre friluftsaktivitetar. Vil me til dømes studera livet i fjæra, så er det fleire plassar i nærleiken som eignar seg til det.
Bruvik skule ligg på Olsnes, om lag 1 km nordaust for Bruvik sentrum. På biletet ser me skulen med Langhelle i bakgrunnen på andre sida av fjorden. Utanfor høgre biletkant skrår fjellet vidare oppover mot Raudnipa (i bakgrunnen) og Hananipa (endå lengre mot høgre og nærare fjorden).
Me har ein fin og ganske ny skule. Han vart teken i bruk i oktober 1999. Skulen har både heimkunnskapsrom og sløydsal, men kroppsøvinga går føre seg i storsalen i Knausatun, eller utandørs.
Skulekoret har til vanleg øving kvar fredag og deltek ofte i samband med skulen sine ulike arrangement.
Som eit ledd i arbeidet med å motverka mobbing og antisosial åtferd, har skulen delteke i Olweus-prosjektet, og byggjer på desse metodane i det vidare arbeidet.